O viñobus vendima é unha viaxe interactiva para aprender todo o relacionado coa recollida da uva e a súa transfromación en viño. A xornada comeza cun paseo polos viñedos para coñecer as partes da cepa, as variedades de uva ou a importancia do chan. Despois da recollida de uva os participantes trasládanse á adega onde se realizarán cata de uvas, mostos e viños, para posteriormente elaborar viño de modo artesanal, pisando as uvas como antigamente.
Deste xeito, o mosto quedará nas cubas para a súa fermentación e os enólogos ocuparanse del ata que estea listo para embotellar e envialo á casa. A viaxe inclúe xantar na adega, a viaxe en bus e as explicacións de guías especializados. As dúas fins de semana previstas poderanse ampliar a 3 se a campaña de vendima se prolonga.
Para participar é necesario reservar a través do correo electrónico turismo@ribeirasacra.org ou no teléfono 638 823 592. Toda a información da actividade pode consultarse no portal do Consorcio de Turismo, promotor da actividade: turismo.ribeirasacra.org.
