A asociación animalista Libera denunciará ante o Consello Superior de Deportes (CSD) as “ameazas” que supostamente recibiron por parte de cazadores participantes na batida de raposo celebrada o pasado fin de semana en Triacastela e Lugo. Os animalistas remitirán gravacións como proba e, ademais, sinalarán “incumprimentos” da lei de caza.
Nun vídeo gravado por estes animalistas pódese escoitar a un dos cazadores dicirlles aos activistas: “Non me graves, que comes a escopeta”. A asociación Libera razoa que se estes “pseudocampionatos” son considerados “actividade deportiva” —algo ao que se opoñen—, “deben estar sometidos a toda unha xurisdición sectorial, tamén sobre prevención de actitudes violentas“.
Así mesmo, Libera asegura que recompilou información sobre supostas irregularidades como “cazadores a menos de 100 metros de vivendas habitadas” ou cans que “cruzaban unha estrada sen control algún”. Todas estas gravacións serán trasladadas ao CSD, aseguran.
Neste sentido, os animalistas recriminan que a Xunta “non se puxera as pilas para endurecer normativamente a actividade, nin sequera para cumprir o establecido na actual lei”. Lembran que en Galicia faleceron “dezaseis persoas como consecuencia da caza” durante a última década.
