As especialidades que se ofertan para o vindeiro curso 2019/20 no Conservatorio Municipal de Música “Mestre Ibáñez” son as seguintes: piano, guitarra, trompa, violín, clarinete, trompeta, saxofón, percusión, tuba e trombón.
A materia de Pre-conservatorio vai dirixida a nenos e nenas de entre 6 e 7 anos, a modo de cursos preparatorios para o grao elemental do conservatorio.
Para os nenos e nenas de entre 4 e 5 anos que queiran ter un primeiro contacto coa música, está aberta a inscrición en Música e movemento, materia englobada na oferta da Escola de Música.
Para consultar calquera información sobre a matrícula é necesario dirixirse á Secretaría do Conservatorio, situada no Edificio Multiusos de Monforte (Ronda de Mª Emilia Casas Baamonde) en horario de 10:00 a 13:00 e 17:00 a 19:00 horas. Outras opcións de contacto son o teléfono 982 403 893 e o correo electrónico conservatorio@concellodemonforte.com
Festival fin de curso do
Conservatorio Municipal
O Festival que clausura o presente curso 2018/19 no Conservatorio Municipal terá lugar o vindeiro mércores día 12 de xuño no Auditorio do centro do Edificio Multiusos as 19:00 horas e correrá a cargo do alumnado do conservatorio, nas especialidades de violín, piano, guitarra, clarinete, frauta, saxofón, tuba, trombón de varas, trompeta e percusión.
As actuacións realizaranse de forma individual, a dúo, ou en pequenos grupos de cámara. Actuarán tamén os grupos de pre-conservatorio, coro e orquestra do Conservatorio.
No concerto, dirixido a todos os públicos e con entrada de balde, interpretaranse obras de autores clásicos e contemporáneos pero tamén pezas de autores modernos e música do folclore popular.
