A Irmandade Cultural País do Faro promove a presentación do libro “A maxia da auga”, do chantadino Alfonso Eiré. O acto terá lugar no Círculo Recreativo e Cultural de Chantada este xoves 5 de marzo a partir das 20:15 horas.
A presentación correrá a cargo de Mercedes Vázquez, responsable de Chantada Comunicación, e no acto estará tamén Francisco Rodríguez, fundador da Editorial Hércules.
A MAXIA DA AUGA
Trátase dun libro de relatos que pretende devolver á vida e actualizar os principais mitos galegos para darlles unha nova visión traídos á actualidade. Narracións que buscan retratar á sociedade actual tendo como referencia as crenzas do pasado.
O título da obra ten sentido partindo da lóxica común de que moitas das lendas ancestrais galegas están, dun xeito ou doutro, relacionadas coa auga nunha Galiza que o mesmo Álvaro Cunqueiro definiu como “O país dos mil ríos”…
O propio autor, dinos na contraportada da súa obra, quizais para rematar de engaloiarnos, que: “neste libro hai moito de lenda, pero aínda hai moito máis de verdade. Procure a súa para ver se lle encaixa“.