A pandemia pode co Meco da Ermida

Por decisión veciñal, este ano quedaron suspendidas a romaría e a procesión que esta parroquia de Quiroga celebra para honrar á Virxe dos Remedios os días 8 e 9 de setembro.

O Meco en plena acción. Foto: XMF

Festas e tradicións como a Romaría da Nosa Señora dos Remedios, que non se deixaron de facer “nin no tempo da Guerra Civil”, este ano quedan suspendidas por mor da Covid19.

Deste xeito, os días 8 e 9 de setembro non poderemos gozar da presenza do Meco e as Pampórnigas nesa multitudinaria e popular procesión. Segundo explica Amparo Montenegro, Presidenta da Asociación Cultural Souto do Val, “falouse cos veciños e veciñas e decidiuse que este ano non houbese nin procesión nin actos festivos”. “Sentíndoo moitísimo, facémolo por unha cuestión de responsabilidade”, engade.

Procesión coas Pampórnigas e o Meco. Foto: XMF

O que si se mantén son as novenas e as misas que se fan no atrio da igrexa e con distancia de seguridade entre os/as presentes. Foi unha decisión do cura e farase todo con responsabilidade, segundo nos indican.

Horarios da ‘Novena á Nosa Señora dos Remedios’

Unha mágoa moi grande perder esta tradición nun “annus horribilis” do que non se escapa nin a figura do Meco e a tradicional procesión na que acompaña ás Pampórnigas. “Nin no tempo da Guerra Civil se deixou de facer a procesión”, afirma Amparo Montenegro.

Para coñecer máis sobre esta tradición podedes ler esta reportaxe que fixemos no seu día en Xornal de Lemos.

DEIXAR UN COMENTARIO

Please enter your comment!
Please enter your name here