Un outono moi activo en Quiroga

O concello programa unha chea de actividades para todos os públicos onde as posibilidades para a formación e para o lecer son amplas e moi variadas.

Vista de Quiroga. Fonte: Facebook Concello de Quioga

Os veciños e veciñas de Quiroga e dos arredores non se poden queixar coas alternativas que ofrece o concello para gozar dun outono activo grazas ás actividades que se presentan: obradoiros, cursos, clases de benestar persoal, concursos, deportes, excursións, festas…

A programación está integrada por propostas que ofrece na súa maioría o Concello de Quiroga a través das súas diferentes áreas: Área de Educación e Infancia, Área de Xuventude, Área de Igualdade e Benestar, Área de Cultura e Área de Deportes, e tamén a través da colaboración con profesionais ou colectivos que son os que propoñen as actividades.

Este mes de outubro, por exemplo, os interesados e interesadas teñen un obradoiro de cestería, un taller de memoria, un curso de monitor de tempo libre e outro de estimulación cognitiva e diferentes clases: de ximnasia, de ioga, de pintura, de música, de galego, de inglés para maiores e pequenos, de informática, de baile tradicional galego, de preparación de graduado en E.S.O. e de teatro.

Outras propostas interesantes programadas para este mes, e relacionadas co coñecemento da contorna, son a actividade infantil “un paseo polo souto”, coa colaboración da empresa quiroguesa Caurelor, e a excursión “Territorio Proxecto Xeoparque Montañas do Courel” a través da Área de Igualdade.

Para os amantes do deporte, a Área de Deportes ofrece este ano fútbol xuvenil, fútbol senior, fútbol sala, voleibol e taekwondo.

No apartado de conmemoracións, hoxe celébrase no Centro Social o “día internacional dos maiores” con chocolatada e baile, o día 19 para conmemorar o “día mundial contra o cancro de mama” terá lugar unha andaina contra o cancro de mama e os días 20 e 27, co gallo do “día das bibliotecas”, faranse dúas actividades na Biblioteca a través do Ciclo Ler Conta Moito da Xunta.

E rematando outubro, o día 31 hai unha Festa do Samaín para nenos e nenas.

 

 

 

DEIXAR UN COMENTARIO

Please enter your comment!
Please enter your name here