EFE.- Os traballos de conservación e restauración que se están a desenvolver na igrexa do mosteiro de San Vicente do Pino, en Monforte de Lemos, sacaron á luz “unhas pinturas murais inéditas en bo estado de conservación e de gran interese histórico e documental”.

O achado produciuse o pasado 31 de xaneiro, tras o retablo maior do templo, despois de que a súa estrutura fose desmontada para o seu traslado e tratamento. As pinturas representan, a modo de grisalla, elementos figurados. Entre outros, pódese observar unha imaxe de Cristo.

OS TRABALLOS DE RESTAURACIÓN

A intervención integral neste templo comezou o pasado mes de decembro. O Ministerio de Cultura e Deporte, a través do Instituto de Patrimonio Cultural de España (IPCE), investiu uns 646.319,27 euros para as actuacións.

A rehabilitación afecta á práctica totalidade do interior do templo: tanto ás pinturas murais do presbiterio, a nave central e o muro norte do cruceiro, como ao retablo maior e o retablo en pedra do cruceiro da igrexa.

A mazonería do retablo maior, datada entre 1770-1780, é obra do denominado ‘Monxe Mil Bens’ -do propio mosteiro- e durante a intervención revisarase a súa estrutura, consolidaranse os diferentes elementos, a policromía e o dourado, ademais de procederse á súa limpeza e reintegración cromática. Este retablo conta cun lenzo central datado en 1671 –con anterioridade á estrutura de madeira– que representa o martirio de San Vicente.

A restauración das pinturas murais e retablos da igrexa de San Vicente do Pino en Monforte de Lemos é unha das actuacións programadas polo Ministerio de Cultura e Deporte, a través do IPCE, no deseño e implementación do Programa Xacobeo de conservación e posta en valor de bens culturais.

Este programa, que foi elaborado en coordinación coa Dirección Xeral de Patrimonio Cultural da Xunta de Galicia e a Fundación Catedral de Santiago, intervirá sobre os bens culturais máis singulares do patrimonio cultural de Galicia, con motivo da celebración do próximo Ano Xacobeo, en 2021.