Unha decena de mozos participa no campo de voluntariado do Castro de San Lourenzo

Dez mozos e mozas de entre 18 e 30 anos, acompañados por tres monitores, compoñen o III campo de voluntariado no marco do Proxecto de San Lourenzo, na parroquia de Cereixa na Pobra do Brollón.

Campo de Voluntariado Castro de San Lourenzo / Concello da Pobra do Brollón

Os voluntarios estarán ata o 13 de agosto axudando nas labores de limpeza e mantemento do Castro de San Lourenzo. Tamén colaborarán en actividades comunitarias e dedicarán gran parte das horas fóra dos traballos no castro a coñecer aos veciños, a historia e as tradicións do municipio.

O campo de voluntariado é financiado pola Consellería de Política Social a través da Dirección Xeral de Xuventude, coa colaboración do Concello da Pobra do Brollón e da Asociación veciñal ‘María Castaña’ de Cereixa.

Castro de San Lourenzo / Concello da Pobra do Brollón

A xefa do Servizo de Xuventude de Lugo, María Grandío, declarou nunha visita ao castro que “trátase do campo máis relevante da provincia de Lugo en canto á vinculación cos veciños e os traballos arqueolóxicos”. Comentou que o Proxecto de San Lourenzo é “emocionante” e que observa grandes avances nos traballos de ano en ano.

Trátase do terceiro campo de voluntariado consecutivo celebrado no castro. Este ano, debido á situación sanitaria, só participan persoas residentes en Galicia e seguen un estrito protocolo de seguridade e hixiene.

DEIXAR UN COMENTARIO

Please enter your comment!
Please enter your name here