Os proxectos, impulsados pola Axencia de Turismo de Galicia, e cun orzamento que rolda os 300.000 euros -159.966 para o de Calvor, e 142.843 para Barbadelo- servirán para renovar as instalacións e para mellorar as condicións de accesibilidade destes edificios. Ambas construcións precisan desas obras para a súa adaptación ás necesidades e demandas propias deste tipo de aloxamentos de peregrinos.

A actuación nos dous albergues contempla a redistribución dos dous andares, reposición das instalacións de electricidade e fontanería, ampliación do sistema de calefacción e posible apertura de novas ventás nas fachadas.

O proxecto contempla un espazo independente de aseos separados na planta alta previo ao acceso ao dormitorio mixto, e un aseo adaptado na planta baixa. Nos dous casos mantense un espazo de cociña con servizo de lavandería integrado e unha sala de estar comedor. No albergue de Calvor proxéctase unha sala na que se podan acomodar de forma eventual dúas persoas de mobilidade reducida. Para o albergue de Barbadelo proxéctase un dormitorio de dúas prazas.

As ofertas que se presenten para acometer estas obras poden presentarse antes do 11 de xaneiro e o prazo de execución das actuacións será de catro meses. Ambos albergues ocupan antigas escolas e foron rehabilitados no ano 1993, o de Calvor ten capacidade para 22 peregrinos e o de Barbadelo para 18 usuarios/as.

O delegado territorial de Lugo, José Manuel Balseiro, salientou que a ruta xacobea e “unha das principais portas de entrada de visitantes á nosa provincia, pola que cada ano miles de persoas achéganse a Lugo de camiño de Compostela, moitas por primeira vez. É o mellor escaparate, e o Goberno galego traballa co obxectivo de seguir avanzando na mellora da súa xestión e posta en valor”.