Durante os dous días do Congreso Internacional tratarase sobre a historia e a cultura da oliveira na comarca, sobre o rexistro de variedades, análises sensoriais e químicos e dos beneficios do aceite de oliva virxe extra para a saúde. Para rematar falando sobre a elaboración e a comercialización do Aceite de Oliva Virxe Extra.

O Concello de Quiroga que segue traballando para acadar etiquetaxe de biosaudable e ecolóxico, ademais de buscar a súa Denominación de Orixe, quixo que a este primeiro Congreso Internacional acudisen todos aqueles expertos  que participaron nos moitos estudos que se realizaron. Os estudos concluían que se trata dun aceite de oliva virxe, excepcional, dende o punto de vista saudable, polo seu contido en polifenoles, como o testemuña a análise realizada polo Departamento de Química Analítica da Universidade de Córdoba, un dos laboratorios máis recoñecidos a nivel mundial.

A venda de aceite elaborado en Quiroga e a representación da elaboración tradicional do aceite no muíño de Bendilló na XX Mostra do Aceite poñerá o colofón a estas xornadas dedicadas a un dos produtos máis importantes do municipio, xunto co viño.