200.000 euros para ampliación e reforma dos talleres do IES A Pinguela

A Consellería de Educación vén de publicar a adxudicación da obra de ampliación e reforma dos talleres do IES A Pinguela de Monforte de Lemos, por importe de 199.994,87 €. As obras compatibilizaranse a partir de setembro co curso escolar, sempre baixo as máximas medidas de seguridade. Os traballos teñen un prazo de execución de 2 meses e medio.

IES A Pinguela / jrcasan.com

A finalidade da actuación é atender as necesidades de espazo dos ciclos formativos que se imparten no IES. Neste sentido cómpre sinalar que o centro acaba de incorporar á súa oferta o novo ciclo de grao medio en Calzado e complementos de moda, na modalidade de FP Dual; así como, tamén nesta modalidade, o de grao superior en Estilismo e dirección de peiteado.

Para iso dotarase o centro dunha nova aula no edificio de talleres, para o que será necesaria a execución dun forxado neste edificio a dobre altura e a apertura de fiestras  nunha das fachadas para iluminar e ventilar. Ademais mudarase a carpintería e modificarase a fiestra existente na outra fachada e redistribuirase a tabiquería da planta superior dos talleres para crear o acceso á aula. Ademais cubrirase o patio anexo ao edificio de talleres cunha cuberta lixeira e estrutura a base de perfís metálicos. 

A actuación completarase coa construción duns vestiarios anexos ao pavillón existente, así como un baño adaptado a persoas con discapacidade, un pequeno despacho e unha sala de instalacións.

DEIXAR UN COMENTARIO

Please enter your comment!
Please enter your name here