Esta estrada tivo que ser cortada ao tráfico á altura do punto quilométrico 6, na aldea de Belesar, enfronte do embarcadoiro da Deputación, para garantir a seguridade dos vehículos logo de producirse un desprendemento de terra e o afundimento de parte da calzada.
As obras consistirán en realizar en primeiro lugar unha pantalla de micropilotes para poder soster o terreo existente e a continuación escavarase unha plataforma de traballo. Executarase un muro de mampostería para proceder á reconstrución da estrada e facer o recheo pertinente. Despois está previsto que se pavimente o treito con aglomerado en quente e realizarase a correspondente sinalización. “Dado que este punto xa se derrubou nos anos 60, con esta obra queda garantido que neste lugar non vai volver a caer,” subliñou o Presidente
Os traballos estarán condicionados polo estado e comportamento do terreo e tamén polas condicións meteorolóxicas dos vindeiros días, que poderán alterar o ritmo e as tarefas previstas. O prazo de execución é de dous meses, pero previsiblemente as actuacións poderán rematar con anterioridade.
Mentres duren as obras, seguirán habilitados desvíos alternativos pola ponte de Belesar e pola estrada LU-533.
O Presidente subliña que a Deputación traballou coa máxima axilidade posible para valorar as actuacións que son necesarias e aprobar o orzamento preciso para arranxar o problema e restablecer o tráfico. “Dende que se produciu o desprendemento ata o inicio das obras, previsto para mañá, pasarán vinte días, co que, tendo en conta a envergadura da actuación e a súa complexidade técnica, a resposta foi rápida”.