“Lugar De” é un proxecto multiplataforma promovido por Xarda, un grupo de xornalistas unidos como “cooperativa feminista, antirracista, antifascista, ecoloxista, anticapitalista e que cre na cooperación entre as persoas.” O primeiro vídeo de “Lugar De…” afondaba na sanidade púbica e universal? e na segunda entrega tratan a situación do ensino público nas zonas rurais de Galicia a través dos casos de Luaña, O Courel e Mazaricos. “Exemplos de como a administración pon trabas ao ensino rural e á propia subsistencia destas vilas,” sinalan.
Á situación en Folgoso do Courel refírense así “cun concurso para licitar o transporte escolar que favorece a grandes empresas e impide que os taxistas da zona, que levan trinta anos dando este servizo, opten a el.” As entrevistas recollidas no vídeo inciden na desigualdade que supón isto para as crianzas do rural, no caso de Folgoso do Courel o cambio de licitación no transporte “provocaría que os poucos nenos e nenas de Romeor tiveran que facer dúas horas de coche cada día.”
No audiovisual falan sobre estes temas e reflexionan sobre os problemas e os beneficios do ensino no rural o taxista e pai Pedro Romeo; Pilar Veiga da ANPA do Colexio Uxío Novoneyra; Lucía Forján da ANPA da Unitaria da Luaña e Mayka Cacheiro, profesora e parte da Federación Provincial de ANPAS Coruña-Costa da Morte.
