A Casa da Cultura de Quiroga acollía este venres, 1 de abril, un acto público organizado polo Bloque Nacionalista Galego, no que baixo o lema QUEREMOS TREN! abordouse a actual situación de abandono que tanto as comarcas de Quiroga e Lemos, como toda Galiza en xeral, sofren ao respecto das frecuencias e infraestruturas ferroviarias.
No decorrer do acto expuxéronse as bases da problemática dando paso ao posterior debate entre os asistentes. En palabras de Rego: ‘O BNG está a desenvolver unha campaña en todo o país para defender un ferrocarril sustentábel, público, de calidade e que se atendan as demandas históricas de Galiza en materia ferroviaria. Dentro desta campaña, estamos a reclamar as necesidades particulares de cada comarca. No caso do Sur de Lugo, formulamos preguntas no Congreso e iniciativas de cara a recuperar as liñas perdidas, así como as conexións e paradas suprimidas, como consecuencia do cambio de horario ocasionado pola chegada do AVE en decembro, que afecta en especial aos enlaces dos estudantes que viaxaban desde a estación de San Clodio-Quiroga’
Desde o BNG na comarca de Lugo Sul, afirman que este acto é a continuación dos desenvolvidos estes meses atrás, entre os que destacan a concentración realizada o pasado día 30 de xaneiro na estación de tren de San Clodio, na que participaron arredor de 200 persoas, ou as recollidas de sinaturas en Quiroga e San Clodio, nas que se pedía acabar coa continua supresión de trens na estación de San Clodio, un servizo que cubría as necesidades da poboación das comarcas de Courel e Caldelas e mesmo do Val de Lemos, demostrando deste xeito, en palabras do vocero do BNG en Quiroga, Xosé Manuel Fernández Montes, “o rexeitamento que as medidas tomadas por RENFE provocan entre a veciñanza”
