A autora da obra gañadora deste ano foi Sonia Álvarez Carnero, veciña de Anllo-Santo Estevo, Sober, e a obra titúlase “Xanela Panorámica”. O xurado considerou que o cartel realizado por esta soberina, segundo palabras do Alcalde José Tomé, “é un deseño moderno que recolle simbolicamente elementos identificativos de Monforte e das nosas festas, como se pode ver na súa parte superior. Xoga ademais co fondo negro para resaltar 4 cores: o verde dos nosos xardíns, o azul do noso río Cabe, o vermello dos fogos artificiais e o amarelo do sol que nos ilumina durante o verán, época en que se celebran as nosas Festas Patronais”.
Este ano presentáronse ao concurso un total de 33 traballos artísticos, 12 máis que o ano pasado. A maioría deles foron elaborados por veciñas e veciños de Monforte, en concreto chegaron 18 de creadores locais, e o resto son obras chegadas de diferentes lugares; de Galicia chegaron 11 traballos, un deles o gañador de Sober, e de fóra da nosa comunidade un total de 4.
O premio para a gañadora é de 1.000 euros e o xurado estivo conformado por unha representación de diferentes empresas creativas da cidade do Cabe.
Todos os carteis recibidos a concurso estarán expostos durante o mes de agosto na Casa da Cultura Lois Pereiro de Monforte. Rematada a exposición, os autores non premiados poderán recuperar os seus traballos.
