A sección Sindical de CIG-SAÚDE no Hospital Comarcal de Monforte denunciou o peche de 28 camas na área de Medicina Interna deste centro. Segundo afirman, este peche suporá un trastorno para os pacientes, que terán que ser relocalizados noutras seccións como a de maternidade e pediatría.

A Dirección do centro xustifica este peche con distintos traballos de mellora. Con todo, a CIG sinalou que estas obras non teñen sentido despois ter aprobado un novo Plan Funcional para o Hospital hai escasos meses.

Representantes deste sindicato tamén denuncian que o Hospital de Monforte está a recibir material vello doutros centros, como camas, sillóns, colchón ou padiolas… Destacan que quen sofren estas carencias son os doentes, que dispoñen almofadas “tercermundistas” e carecen de roupa de cama axeitada.