A fin de semana do 29 e 30 de xuño terá lugar o I Encontro de Barranquismo no Xeoparque Mundial da UNESCO Montañas do Courel, que vén de gañar un premio Agader. Os 15 barrancos catalogados dentro do Parque serán o escenario de diversas actividades durante estes dous días.

As actividades deron comezo ás 10:30 da mañá no Salón de Actos do Concello de Folgoso do Courel, onde se presentou a Guía de Barrancos do Xeoparque. Este documento contén toda a información sobre estas paraxes, eixo central deste encontro. Ata as 20:00 da tarde desenvolverase a actividade no barrancos, e media hora máis tarde terá lugar a presentación oficial do vídeo sobre o Xeoparque, aberta ao público. O día rematará cunha cea de confraternidade ás 21:30. O domingo a actividade dos barranquistas centrarase entre as 9:30 e as 13:00.

A organización salientou que levará a cabo unha campaña de sensibilización ambiental entre os participantes. Aqueles que retiren lixo durante o desenvolvemento das actividades recibirán un lote de produtos locais das Montañas do Courel.