O Festival Carude Rock é unha iniciativa que nace da Asociación de Veciños do Barrio de Carude no ano 2016, integrándoo dentro da mesma celebración das festas do barrio na honra a San Lázaro. Pero este ano 2019, decidiron cambialo de datas pola climatoloxía e por non facelo coincidir coas festas do barrio, de carácter máis tradicional.
O obxectivo do Carude Rock, un festival que conta co apoio do Concello de Monforte é, en verbas do Alcalde “ser un bo escaparate para os grupos da nosa bisbarra, e que poidan darse a coñecer ante o público. E ademais, suporá unha importante actividade para o barrio de Carude, que esa noite estou seguro recibirá a centos de visitantes.” O Concello subvenciona cunha axuda de 3.800 euros ó Festival, sendo o principal patrocinador do mesmo.
O Carude Rock contará coas seguintes actuacións, todas elas de balde e que terán por escenario a praza de Carude: Sr. Jingels do Barco de Valdeorras, Kambotes de Rodeiro, En mala hora de Ourense, Dani Barreiro & Friends de Vilagarcía de Arousa, Acapulco 94 desde Sarria cun tributo a Héroes del Silencio.
Desde a organización do Carude Rock premiarase, o propio día dos concertos, a todos os que acudan vestidos coa camisola oficial, cunha pancetada de balde ata as 22:00 horas. Haberá tamén posto de bocadillos, e un concurso fotográfico na rede social Facebook para o que hai que saír vestido coa camisola oficial.
