CC.OO. Industria de Galicia reuniu o pasado xoves 22 de agosto no seu local da cidade de Monforte de Lemos á executiva galega coa intención, entre outras, de planificar unhas xornadas con técnicos do sector agroalimentario e industrial a realizar o vindeiro 18 de setembro.

Dende o sindicato consideran de vital importancia para poñer freo á despoboación na Comarca de Lemos a atención á cidadanía ofrecendo os mellores servizos básicos como son a educación, sanidade e boas conexións a internet ademais de buscar alternativas viables no agro e mellorar o sector industrial na zona.

Na rolda de prensa comentouse que a provincia de Lugo estaba entre as dez últimas de España en servizos básicos á cidadanía -educación, sanidade, internet- e non se pode permitir, máis se cabe se o obxectivo a futuro pasa por frear a despoboación no rural.

A Secretaría de CC.OO. Galicia ve un gran potencial na recuperación das 5.000 hectáreas de campo coas que conta Lemos para dedicar á horticultura cun sistema de regadío que xa quixeran noutros lugares, creado en 1970 e que ten máis de 200 quilómetros de canle e acequias. Isto en relación ao potencial que ten o agro, pero tamén comentaron que hai que activar o Porto Seco e outros polígonos como o do Reboredo.

Ademais de avanzar posibles solucións para atallar o despoboamento nesta Comarca de Lemos, o secretario para Galicia de Comisións Obreiras, Vítor Ledo, e o secretario xeneral de CC.OO. Lugo, José Luis López, anunciaron a realización dunhas Xornadas Técnicas especializadas no sector agroalimentario e industrial nas que participarán expertos da Universidade de Vigo como Antón Reino e José Manuel Lago. Estas xornadas están programadas para o 18 de setembro.