A solicitude de inscrición da Denominación de Orixe Protexida presentouse perante a Consellería de Medio Rural, a través da Xefatura Territorial de Lugo, o día 14 de marzo de 2019. Xunto coa solicitude de Denominación achegouse a documentación esixida pola lexislación vixente necesaria para a apertura e tramitación do correspondente expediente, que o executivo galego ten que remitir ao Ministerio de Agricultura, primeiro, e á Unión Europea, despois.

Transcorridos máis de tres meses dende que se formulou a solicitude, a Agrupación de Produtores e Envasadores de Aceite de Quiroga non ten coñecemento do estado de tramitación da mesma, especialmente no que se refire aos artigos 8 e 9 do Real Decreto 1335/2011, de 3 de outubro.

Desde o concello informan que se transcorrido o prazo de 6 meses que teñen para resolver, que remata o día 14 de setembro de 2019,  non se recibe contestación, presentarase o recurso correspondente.

O aceite de Quiroga presente en ‘la vuelta’ Ciclista a España

O aceite de Quiroga, que loce xa a denominación de Biosaudable -distinción avalada polo departamento de Química Analítica da Universidade de Córdoba-, formará parte do stand “..E para comer, Lugo”, que a asociación de hostalaría da provincia de Lugo vai colocar na zona vip de todas as saídas de etapa da volta ciclista a España que comeza este sábado, 24 de agosto, en Torrevieja e remata o día 15 de setembro en Madrid.

Esta será a primeira vez que o aceite de Quiroga participa nesta promoción turística que fai a asociación de hostalería da provincia dende hai oito anos e na que participan produtos presentados polos consellos reguladores da Ribeira Sacra, Ternera Gallega, Queixos Arzúa-Ulloa, Queixo do Cebreiro, de Tetilla e San Simón. Así como polas Indicacións Xeográficas Protexidas da Pataca de Galicia, Castaña de Galicia, Fabas de Lourenzá, Grelos de Galicia ou Pementos de Mougán, entre outras.