Aseguran desde o BNG que a Xunta de Galicia continúa coas mesmas promesas que nunca se cumpren. A deputada por Lugo, Olalla Rodil, denuncia que “hai proxectos que o Partido Popular leva anunciando os últimos catro anos a bombo e prato en Lugo e aínda non vimos mover unha pedra”.

Segundo Rodil “É unha tomadura de pelo á veciñanza de Lugo, de Sarria e de Monforte. O PP comprometeuse a converter o corredor en autovía en 2011, van oito anos e non fixeron nada malia que as expropiacións no tramo Nadela-Sarria están feitas xa.”

Outras cifras que se repiten como eternas, segundo o BNG son os 450 mil euros do Plan Paradai ou os 750 mil euros do Porto Seco de Monforte. O BNG asegura que defenderá a través do proceso de tramitación dos orzamentos que comeza agora no Parlamento os investimentos que merecen as comarcas de Lugo e o necesario impulso de proxectos que levan unha década de retrasos e incumprimentos do PP na Xunta.