O home que hoxe ía ser xulgado na Audiencia Provincial de Lugo por abusar sexualmente da filla duns coñecidos seus, cando a vítima tiña quince anos de idade, aceptou finalmente unha pena de 1 ano de prisión, despois do acordo de conformidade ao que chegaron a Fiscalía e o seu defensa.
Ao non haber acusación particular por parte da vítima, a defensa chegou a un acordo co ministerio fiscal, de modo que se lle aplicou ao procesado unha “eximente incompleta por alteración mental”, segundo explicou o seu propio avogado.
O ministerio fiscal solicitaba inicialmente cinco anos de cárcere e outro seis de liberdade vixiada por uns feitos que sucederon o 24 de agosto de 2016, na vivenda que usaban para pasar as súas vacacións os coñecidos do acusado, na zona de Monforte de Lemos.
Segundo o relato do ministerio público, o acusado entrou na vivenda dos pais da moza porque xa estivera noutras ocasións na casa, dado que era coñecido deles e realizara algunhas obras no inmoble.
O día de autos, sobre as 15:45 horas, a vítima estaba a durmir na súa habitación, no domicilio vacacional dos seus pais, cando se decatou de que alguén entrara na súa habitación, pero como pensou que se trataba do seu pai e estaba tapada cunha saba, díxolle que non a destapase, porque “tiña febre”.
Con todo, o acusado, supostamente, apartoulle a saba, polo que a adolescente deuse conta de que non se trataba do seu pai e ao incorporarse atopouse co home, que estaba sen camisa e, con “ánimo libidinoso”, achegouse á súa cara para bicala, á vez que lle acariñaba a coxa. A moza púxose “moi nerviosa”, segundo o fiscal, pero conseguiu chamar por teléfono a unha amiga “de forma disimulada para pedir axuda”, momento no que o acusado saíu da habitación.
Aos poucos minutos, “regresou en calzóns”, polo que ela saíu da cama e, á vez que seguía falando por teléfono escondeuse na planta baixa da vivenda á “espera de que chegasen as súas amigas”. Os pais da vítima non quixeron formular denuncia, pero dado que a menor na súa declaración en sede xudicial expresou o seu desexo de denunciar os feitos, o ministerio fiscal “sostivo o exercicio da acción penal”.
