A Garda Civil activou o protocolo habitual de procura de persoas desaparecidas para tratar de localizar a Ana María Ares, unha muller de 47 anos de idade, veciña da localidade de Sarria, da que nada se sabe desde a mañá de onte, cando marchou para ir traballar a Lugo.

Fontes da Garda Civil informaron de que, de momento, “todas as hipóteses seguen abertas” en canto á desaparición de Ana María Ares, que foi concelleira do Partido Socialista no municipio de Sarria.

Ademais de activar o protocolo de persoas desaparecidas, abriuse unha investigación para aclarar cales poden ser as circunstancias desta ausencia.

Na procura participan desde o xoves axentes de Seguridade Cidadá e da Garda Civil de Tráfico, por se a muller puido sufrir un accidente de camiño ao seu traballo, e solicitouse a colaboración de guías caninas e mesmo dun helicóptero.