O Concello do Saviñao habilitará en xaneiro o servizo de recollida de plásticos agrícolas en todas as explotacións gandeiras do Saviñao. A iniciativa formaba parte do programa de gobernabilidade dos populares. O máximo mandatario local deu conta desta iniciativa ao Pleno na última sesión celebrada, acadando a unanimidade da Corporación.

A empresa SIMA SL será a encargada de facer a recollida a custe 0 para os gandeiros cada tres meses. Esta farase, ademais, a demanda dos mesmos. Explica o rexedor, “poñemos en marcha este servizo que lles evita aos gandeiros ter que levar os plásticos ao punto limpo”.

“É dicir, por unha banda, poñemos disposición dos mesmos un servizo gratuíto e, pola outra, aforrámoslles o custe e o tempo que empregaban ata o de agora de ter que depositalos neste lugar. Entendemos, por tanto, de que se trata dunha boa noticia para os agricultores, solucionando tamén o problema medioambiental que pode ocasionar a acumulación destes residuos”, conclúe.