A Concellaría de Muller e Igualdade de Monforte, a través do CIM, organiza a Xornada Formativa: Prevención do acoso sexual e acoso por razón de sexo na Administración Municipal, que terá lugar este venres 13 de decembro, ás 12:30 h., no Salón de Plenos do Concello. Encargarase da xornada Tania Merelas Iglesias, Doutora en Ciencias da Educación, postgrao en Xénero e en Políticas Públicas de Igualdade, e vai dirixida a todo persoal político e municipal do Concello.
Esta sesión formativa ten como obxectivo dar a coñecer e prever o acoso sexual e o acoso por razón de sexo no ámbito municipal, partindo dos contidos recollidos na Guía de prevención de acoso por razón de sexo na Administración Municipal publicada polo Concello de Monforte en maio 2019.
O reto actual está en trasladar a través de sesións formativas como a deste venres, os coñecementos prácticos necesarios para dispor da información sobre como previr, detectar e combater situacións de acoso sexual e por razón de sexo, permitindo a adquisición dun compromiso na que se implique a todo o persoal político e municipal do concello, xerando un proceso de reflexión, sensibilización e aprendizaxe nesta materia
RIBEIRA SACRA E OUTROS PATRIMONIOS DA HUMANIDADE
Outra cita deste venres en Monforte lévanos ao centro do viño da Ribeira Sacra coa exposición do pintor Arturo Ceide. Ceide comezou a fraguar Ribeira Sacra a outros Patrimonios da Humanidade no ano 2010 coa exposición “Luz, auga e Ribeira Sacra”, “Ribeira Sacra e outras luces” no 2011, “Ribeira Sacra Patrimonio da Humanidade” no 2013, “ Ribeira Sacra e outros Patrimonios” no 2016. Sempre incluída dalgunha maneira como estandarte nas súas variadas exposicións, non como idea institucional se non con fin artístico.
“Na Ribeira Sacra coexisten a cultura, a paisaxe, os ceos, as luces, as cores todos eles conceptos realmente universais que temos a obriga de por en valor con orgullo. Amar a terra, leva implícito desexar que sexa apreciada polo resto do mundo, porque este anaco de espectacular factura ten todas as connotacións artísticas especiais para amosarse sen complexo algún a carón de outros lugares”, sinala Ceide
“Na Ribeira Sacra, co seu soberbio románico de amplo estudio, a súa biodiversidade, os seus ríos, a súa climatoloxía, os seus viños e todo o seu potencial humano estamos convencidos de que pode formar parte do conxunto dos Patrimonios da Humanidade. Para moitos de nós a ribeira Sacra xa é Patrimonio do mundo, designala non nos compete, amala si”, conclúe o artista.
