A Asociación de Municipios do Camiño de Santiago, que integra a 100 localidades, celebrou a súa X Xunta Directiva este luns, na Casa do Concello do municipio lucense de Sarria. O alcalde anfitrión, Claudio Melquíades, é actualmente o secretario da Asociación e abriu a xornada salientando o papel do municipio con gran tradición xacobea e berce de Elías Valiña Samperdro, párroco do Cebreiro considerado o gran impulsor do auxe das actuais peregrinacións a Santiago de Compostela. A reunión foi a primeira da recentemente estreada nova Xunta Directiva da AMCS que decidirá o rumbo da Asociación ata o ano 2021.
Tras a presentación dos membros da nova xunta directiva, deuse conta do informe das accións desenvoltas no cuarto trimestre de 2019 e fíxose avance do plan de traballo de 2020. Os trece municipios sumarán esforzos para fortalecer, protexer e reivindicar o papel do Camiño de Santiago Francés dentro dos Roteiros Xacobeos a Santiago como o “O Camiño máis representativo da antigüidade, Patrimonio da Humanidade, 1º Itinerario Europeo e o único declarado Ben de Interese de Cultural”.
Os socios directivos tamén apoiaron a instancia do Concello de Sarria para defender a reconstrución e rehabilitación da ‘Ponte Ribeira’, ponte do municipio que se derrubou hai cinco anos e que databa de 1.252 como elemento funcional do Camiño de Santiago e Patrimonio Cultural de Galicia vinculado ao Roteiro por Sarria. Será obxecto de próximas decisións instar a Patrimonio e á Confederación Hidrográfica do Miño Sil á autorización inmediata para a instalación dunha pasarela provisional e, posteriormente, á redacción de proxectos para a reconstrución, rehabilitación e posta en valor da antiga ‘Ponte Ribeira’ tal e como orixinariamente foi concibida como paso de peregrinos.
