Trátase da primeira edición en galego da obra “Mi pecado mortal. El voto femenino y yo”, libro que escribiu Clara Campoamor no ano 1936 narrando a súa loita pola igualdade defendendo o dereito a decidir da muller.

A presentación correrá a cargo da editora e redactora do prólogo, Celia Pereira Porto, que contará tamén coa intervención de Xosé Rodríguez Díaz.

Clara Campoamor naceu en Madrid en 1888 e finou en Suiza en 1972. Foi unha importante política española que levou o feminismo por bandeira durante toda a súa vida. Pasou á historia por defender, con moitos atrancos (incluso os do seu propio partido), o sufraxio universal, algo que, en realidade, significaba a defensa do voto feminino. Logo dun traballo brutal dentro e fóra das Cortes, conseguiuse, grazas á súa iniciativa, o 1 de outubro de 1931. Neste libro que agora tedes nas mans explícase, en boa medida, aquela epopea, aquela loita de xustiza.