A asociación que agrupa aos técnicos e técnicas dos CIM de Galicia (ASOCIM) traslada nun comunicado a súa valoración polas recentes sentenzas dos crimes machistas de Ana Enjamio e Diana Quer.

A nivel global, ASOCIM valora de forma positiva as condenas de César Adrio polo asasinato de Ana Enjamio e de José Enrique Abuín Gey, coñecido como O Chicle, polo de Diana Quer. A organización considera xustas ámbalas dúas sentenzas, dada a crueldade dos dous crimes machistas que máis sacudiron a conciencia da sociedade galega nos últimos tempos. En relación ao caso de Ana Enjamio, a asociación congratúlase de que se contemplara a agravante de xénero e agarda que se estime en procesos análogos futuros. Non obstante, a Xustiza non considerou a violencia de xénero e a agresión sexual no referente a Diana Quer.

ASOCIM chama á aplicación da perspectiva feminista tanto a nivel xudicial como na abordaxe informativa nos casos de violencia machista que permita contextualizar o ocorrido na problemática social, fuxindo do suceso e o morbo.

O Chicle foi condenado a prisión permanente revisable e a dez anos de liberdade vixiada polo asasinato de Diana Quer con aleivosía, ademais de detención ilegal e un delito contra a liberdade sexual. Pola súa parte, César Adrio foi condenado a 30 anos e catro meses de cárcere polo crime, con asañamento, concorrendo as agravantes de xénero e de parentesco, de Ana Enjamio.