Os traballos suporán a mellora de diferentes treitos coa finalidade de incrementar a seguridade viaria. En concreto, afectarán á vía de alta capacidade VG-2.1 de Monforte; á LU-933 neste mesmo concello e á LU-546 (vía que conecta Nadela con Monforte) ao seu paso polos termos municipais do Corgo, Láncara, O Páramo e Sarria.

Na VG-2.1 actuarase en toda a lonxitude da vía (2,83 quilómetros) para realizar unha renovación completa da capa de rodaxe na calzada e nas beiravías, cun investimento aproximado de 491.300 euros.

Na LU-933, está previsto mellorar o firme coa extensión dunha nova capa de rodaxe ao longo de cinco quilómetros entre Monforte e Bascós (puntos quilométricos 0,206 a 6,458), incluído o treito urbano dentro da localidade monfortina. Tamén se realizará unha limpeza de gabias e noiros. O orzamento da actuación rolda os 310.200 euros.

Pola súa banda, na LU-546 actuarase nuns 10,7 quilómetros, dende o pq 10,619 ao 21,335. O proxecto contempla o reforzo localizado do firme, mediante a realización de fresados a carril completo e a extensión dunha nova capa de rodaxe en carrís e beiravías. A estes traballos destínanse uns 247.200 euros.

En todas as estradas está previsto completar as actuacións de mellora do firme coa  execución posterior de tarefas de reposición e renovación da sinalización horizontal e balizamento.As empresas interesadas en presentar as súas ofertas poden facelo ata o día 30 de marzo. O  departamento de Infraestruturas prevé que no vindeiro verán poidan comezar as obras, que teñen un prazo de execución de seis meses.