A CIG Saúde de Monforte asegura este mércores, 25 de xaneiro, que os traballadores do Hospital Comarcal de Monforte, “non se atopan tranquilos” nas condicións nas que se atopan traballando pola falta de medios. Sinalan desde o sindicato que, “Hai escaseza de material tanto en urxencias como nas plantas e no resto de servizos. Parécenos moi ben non alarmar a poboación, pero non nos parece normal que se nos tome por tontos.”
Os sanitarios denuncian a falta de material, que os obriga a traballar en condicións infrahumanas, “Non se pode traballar con posibles doentes co virus e sen o material de protección adecuado. E por se isto fora pouco, estanse a dar ordes contraditorias, un día din unha cousa e o seguinte, a contraria. Esiximos protocolos claros de actuación.”
Lembran á xerencia do Hospital, que as traballadoras de especialidades tivéronse que “buscar a vida” e falar con empresas da contorna para poder ter mascarillas FP2, porque o Hospital non as facilitaba. Sinalan tamén, que en urxencias e raios os traballadores fixeron máscaras de protección e “teñen que levar traxes e gafas reutilizadas,” como xa informaran desde Xornal da Mariña.
Nun momento no que os sanitarios representan unha parte importante dos contaxiados polo COVID19, desde a CIG afirman, que se hai material debe facilitárselle aos traballadores para evitar contaxios masivos, e non facelo califícano como delito.
Denuncian que a médica de medicina preventiva que debería velar pola seguridades dos traballadores leve meses de baixa e aclara que en Monforte non hai UCI, “O que temos é unha REA adaptada con cinco camas que cando sexa o pico máis grande, moito tememos que vai ser insuficiente. A este hospital se lle prometeu contar cunha UCI que nunca chegou.”
Desde o sindicato insisten nas disponibilidade dos sanitarios a pesar da falta de material e denuncian a situación na que se atopa o PAC co plan de continxencia, “Fíxose un dobre circuíto PAC-URXENCIAS, pero nalgunhas zonas a única separación que hai é un PLÁSTICO. A sala onde está ubicado o persoal non reúne as condicións mínimas”, polo que os traballadores do PAC piden que se reubique o PAC noutro sitio. Segundo o sindicato, os traballadores deste servizo tamén se queixan de que non lles facilitan o material adecuado para exercer o seu traballo con garantías.
COIDA A QUEN TE COIDA.
