O CAPD de Sarria quédase sen Covid19 despois de que chegase a rexistrar oito casos entre os usuarios e case unha vintena entre o persoal. No resto de centros e residencias da zona sur, os casos activos mantéñense estables e o Hospital Comarcal de Monforte achégase a unha semana sen hospitalizados por coronavirus.
En Galicia son 92 as persoas con discapacidade e 52 os empregados destes centros que continúan infectados da COVID-19, cifras que mostran que non se produciu ningún aumento desde o balance do domingo. Como principais focos entre os usuarios, continúan o CAPD de Redondela, con 36 casos; o CAPD da Coruña, con 26; e a DomusVi de Bóveda, con 13. Entre o persoal, o centro de Redondela aínda contabiliza 13 positivos de coronavirus e séguenlle o CAPD da Coruña (7) e a DomusVi Bóveda (9).
O número de casos activos de coronavirus COVID-19 en Galicia ascendeu en 35 infectados con respecto ao domingo ata o 6.891, o que supón un incremento dun 0,5%, e as altas aumentaron en 13 ata situarse nas 1.816.
