Este xoves, 25 de xuño, a provincia de Lugo conta con 27 casos activos de coronavirus, 10 máis ca onte, dos que 2 están en hospitalización, un deles no HULA e o outro no Hospital Público da Mariña. Os 25 restantes están confinados nos seus domicilios, 9 máis ca onte.
Os 10 novos positivos detectados corresponden todos á zona da Mariña, 8 deles pertencentes a un brote nunha familia de Xove. Outro dos novos casos é o dunha muller que deu positivo nunha proba de Covid-19 previa a unha operación no centro hospitalario de Burela e en canto ao novo hospitalizado na Mariña é un home de 71 anos, residente en Burela. Segundo confirmou o propio Sergas, realizáronse 25 probas PCR máis, polo que nas vindeiras horas poderían confirmarse máis positivos.
Ao incremento de 10 novos casos na área sanitaria de Lugo, súmase un na de Ourense, o que deixa Galicia con 333 casos activos, mentres que as persoas curadas son 10.563.
