A celebración tivo lugar neste último domingo de setembro coa participación dos integrantes das asociación promotora, a asociación constituída hai case 30 anos por Aida Menéndez, a Asociación Cultural Camiños a Santiago pola Ribeira. Contouse cunha ampla representación tamén dos concellos polos que pasa a ruta e que forman parte da Asociación de Municipios do Camiño Santiago de Inverno.
As xornadas serviron para render homenaxe ás persoas e entidades que contribuíron a conseguir a oficialidade hai 10 anos e a posterior consolidación do Camiño de Inverno, así como para facer balance do camiño percorrido desde o seu recoñecemento.
A celebración estivo guiada pola presidenta da Asociación Camiños a Santiago pola Ribeira Sacra, Ana Bernárdez, que agradeceu a boa disposición da nai abadesa para poder desenvolver este acto no Mosteiro do Divino Salvador de Ferreira, nunha xornada na que se celebraba o Día Mundial do Turismo e destacou a importancia desta ruta, “o Camiño é territorio vivo e seguimos promovendo actividades para promocionalo, unha das máis importantes é a andaina escolar, na que reunimos no camiño a máis de 2.500 nenas/os”. Esta cita celebrarase este venres, 2 de outubro.
Ana Bernández 10 anos oficialidade Camiño de Inverno / XdL
Na mesa redonda das xornadas interviron Julia Rodríguez Barreira, deputada no Parlamento de Galicia no momento da oficialización; José Luis Rivera Castro, alcalde de Quiroga e representante da Asociación de Municipios do Camiño de Inverno; Raquel Arias Rodríguez, vicepresidenta do Parlamento de Galicia e o director da Axencia de Turismo de Galicia, José Manuel Merelles que destacaba do escenario, “non se me ocurre mellor sitio para celebrar o día do turismo” e enxalzaba o Camiño de Inverno, “Un dos elementos máis vertebradores do interior de Galicia, unha ruta que axuda á desestacionalización e a fixar población e visitantes. En 10 años multiplicou por 10 o número de peregrinos”.
No encontro intervirían tamén o alcalde de Pantón, José Luis Álvarez e o deputado, Francisco Conde; que coincidiron na necesidade de construir un proxecto de territorio entre todos e que o Camiño o había que facer todos xuntos.
A xornada completaríase coa presentación do documental “Unha década de pegadas e voces”, da produtora Némesis Audiovisual, unha viaxe pola paisaxe do Camiño, que repasa a historia desde finais dos 90, contando con material editado con Aida Menéndez, ademais dos relatos doutras persoas que participaron no proceso de recuperación e recoñecemento do itinerario.
Uns petiscos pecharían esta celebración que reuniu a máis dun cento de persoas estreitamente relacionadas co camiño e coa promoción do seu patrimonio, como Máis que Románico.
“Unha década de pegadas e voces” / XdL
