Os traballos de construción do novo cámping de Ribas de Sil, que se ubicará a carón da Praia Fluvial de San Clodio, supoñen un investimento de 420.000 euros para dúas fases de adaptación. Do montante total desta partida presupuestaria, 320.000 euros son aportados polo Concello de Ribas de Sil e os restantes 100.000 pola Deputación de Lugo.

As obras desta primeira fase de construción, que presumiblemente estean rematadas a mediados do vindeiro ano, consistirán en traballos de urbanización, xardíns, dotación de auga e luz na área destinada a acampada, ademais da construción dos edificios comúns como son a cafetería, recepción, restaurante e aseos. A segunda parte do proxecto engloba o levantamento de 8 bungalós de 36 metros cadrados cada un.

Este cámping, de titularidade municipal e dividido en 3 parcelas -zona de acampada, zona de caravanas e outra de bungalós– , estará moi preto da zona recreativa da praia fluvial de San Clodio, unha das áreas máis visitadas da contorna pertencente á Ribeira Sacra.

Santos Ramos, Deputado de Relacións Institucionais da Deputación de Lugo sinalou que, “este camping supón unha gran oportunidade de hospedaxe para o Concello de Ribas de Sil, pois terá capacidade para albergar a un centenar de persoas. Ademais, constitúe unha alternativa sostible para ampliar a oferta hoteleria.