A mediados do mes de abril a Asociación de Comerciantes e Empresarios de Sarria puxo en marcha unha plataforma de venda de bonos (www.acesarria.net) para apoiar ao comercio local. O obxectivo era xerar liquidez para facer fronte aos pagos, ante a falta de ingresos, coa venda de bonos que posteriormente se canxearon por produtos ou servizos.
A plataforma tivo un gran éxito de participación e foi unha fonte de motivación para os establecementos participantes. En resultados cuantitativos vendéronse máis de dez mil euros nos distintos tipos de bonos postos a venda, máis de 200 bonos, en apenas tres semanas.
Un tipo de bonos eran os bonos solidarios, os clientes que mercaban este tipo de bonos doaban o 10% que lle regalaba o comercio, para apoiar á “Cruz Vermella de Sarria”, colaborando con este organismo veciño, na loita dos efectos da COVID-19. A plataforma iniciouse con 15 establecementos que se foron ampliando ata chegar aos 24, establecementos de distintos sectores, socios e non socios da ACES.
Na entrega do material (cueiros e toalliñas) estivo presente Ricardo Arias, presidente da Asociación de Comerciantes e Empresarios – CCU de Sarria e Jaime Capellá, presidente Asamblea Local Cruz Vermella de Sarria.
