O programa Coñece a túa provincia, que impulsou a Deputación de Lugo hai seis anos co obxectivo de promocionar os recursos turísticos dos concellos e de dinamizar as economías locais, finalizou a súa sexta edición superando os 3.000 participantes. As visitas, destinadas a asociacións e entidades sen ánimo de lucro, están guiadas, son gratuítas e desenvólvense durante os meses de abril, maio, xuño, setembro e outubro. Segundo explican dende a institución provincial, o impacto económico na hostalería e no comercio é relevante, e calculan que “o investimento por persoa é de 67,40 euros, de maneira que o orzamento que mobiliza o programa supera os 200.000 euros”.
Esta última edición rexistrou unha demanda sen precedentes, elevando o número de peticións ata as 366 solicitudes, a cifra máis alta desde a creación do programa e moi por riba das 141 rexistradas na primeira edición de 2021. Grazas á novidade introducida nas bases da convocatoria de 2026, que priorizaba a participación de entidades que aínda non gozaran da iniciativa, acadouse un fito destacable: o 100% das 137 asociacións beneficiarias viaxaron por primeira vez, mobilizando a preto de 3.000 viaxeiros e viaxeiras de toda a provincia. O alcance territorial reflectiuse nunha ampla representación municipal, con colectivos procedentes de multitude de concellos, como Lugo (26), Vilalba (11), Ribadeo (7), Foz (6), entre outros.
RIBEIRA SACRA E MARIÑA, DESTINOS MÁIS DEMANDADOS
Entre os percorridos máis demandados e executados ao longo da tempada destacaron as rutas por Sober e Monforte (9), Chantada e O Saviñao (8), Barreiros e Ribadeo (8), ou Quiroga (7), entre outras, demostrando o interese crecente da cidadanía por redescubrir a riqueza cultural, paisaxística e etnográfica da provincia de Lugo.
O programa mantivo un catálogo de 44 rutas xerais e 7 adaptadas, específicas para persoas con discapacidade física, distribuídas polos 67 concellos da provincia de Lugo.
TURISMO DE PROXIMIDADE E GASTOS PAGOS
Os itinerarios propostos para os colectivos participantes inclúen transporte de ida e volta, póliza de seguros de viaxeiros, un menú de xantar baseado en produtos de proximidade, servizo de guía oficial de turismo e as entradas a museos, obradoiros artesáns e itinerarios en catamarán.
Ademais do anterior, a xornada inclúe unha visita a algún dos centros dependentes da Deputación para que a cidadanía coñeza in situ instalacións e servizos da Deputación como son: o Pazo de San Marcos (sede da institución), a Granxa Gayoso Castro, o Mazo de Santa Comba, o Centro de Interpretación Terras do Miño ou a Produtora de Audiovisuais.
