O Servizo Galego de Saúde (Sergas) informou este sábado dun novo caso positivo e 20 altas relacionadas co brote da Mariña, polo que o número de casos activos baixa a 119. Catro persoas con Covid19 permanecen ingresadas no Hospital de Burela, unha menos ca onte.
A día de onte, como informaba o Xornal da Mariña, incorporando os 15 casos non comunicados aos medios de comunicación polo Sergas pero si recollidos no auto xudicial que ratificou as medidas de peche da comarca adoptadas o pasado 10 de xullo, documentábanse 239 persoas afectadas polo brote, 144 activos e 95 coa alta epidemiolóxica.
Os casos activos por coronavirus en Galicia sitúanse en 218 segundo a información de Sanidade, dos que 148 corresponden á área de Lugo –12 menos que no parte do venres–; 31 á da Coruña e Cee –catro máis–; sete á de Santiago e Barbanza –sen cambios–; 17 á de Vigo –tamén sen cambios–; cinco á de Ourense –sobe nun–; un á de Ferrol –igual– e nove á de Pontevedra –sobe nun–.
