Este sábado, 1 de agosto, a provincia conta con 74 casos activos de coronavirus, dos que 39 se sitúan na Mariña, onde a mediados do pasado mes de xullo chegou a haber 180 casos activos.
Outro foco importante está no Saviñao e Paradela con 15 casos. Precisamente volven a darse casos de coronavirus nas residencias de maiores da zona sur da provincia cun novo caso na residencia de Paradela, a persoa infectada é un traballador.
Dos casos activos na provincia, 71 están en domicilio e 3 en hospitalización, 1 no HULA e 2 no Hospital Público da Mariña. O histórico ata o día de hoxe na provincia é dun total de 1.183 casos contando as altas e curados; con 28 falecementos.
Mentres, os casos activos en Galicia incrementáronse en 28 este sábado e volve superar os 300, máis dun terzo dos cales corresponden á área sanitaria da Coruña, onde o foco relacionado co porteiro dun local de ocio nocturno que acudía a un ximnasio en Arteixo acumulaba o venres 25 contaxios, de acordo cos datos facilitados pola Consellería de Sanidade.
