Primeiras reaccións á morte dun can tiroteado en Láncara. A Asociación Animalista Libera reclamou esta mañá unha maior “implicación do conxunto das administracións públicas” con vistas a evitar “novos casos” semellantes ó acontecido no municipio da comarca de Sarria.
Tal e como lembran dende a asociación, o presunto crime polo que foi imputado un home de 55 anos “súmase a outros sucesos similares na provincia durante o último ano”. Para a plataforma, o acontecido en Láncara “evidencia a despreocupación pola materia” a respecto dos poderes públicos, contra os que carga por “non ter tomado medidas” para evitar “situacións similares”.
URXEN Á ADMINISTRACIÓN A “POÑERSE AS PILAS”
Ante esta circunstancia, o colectivo animalista vén de urxir á Deputación Provincial e aos municipios lucenses “a poñerse as pilas” coa planificación e desenvolvemento dunha estratexia de sensibilización continuada que axude a previr, identificar ou localizar futuros actos de crueldade cara aos animais, e que sirva para educar á cidadanía.
“Os disparos de Láncara poñen sobre a mesa un debate ineludible: a falta de políticas públicas de benestar animal, que na provincia se reducen á licitación de servizos de recollida ou a redactar convenios con entidades non lucrativas”, conclúe o comunicado da plataforma animalista.
