A coñecida asociación, referente galego na defensa da nosa lingua, pretende conseguir que a corporación RTVG aumente a oferta de contidos destinada aos máis cativos e á mocidade a través da creación dunha canle temática -Xabarín Club- con programación as 24 horas en galego.
Para conseguilo A MESA impulsa unha Proposición Non de Lei de Iniciativa Popular, un mecanismo contemplado na lexislación que permite rexistrar unha proposta para ser asumida por algún dos grupos parlamentarios e debatida despois no Parlamento sempre que se reúnan un mínimo de 2.500 sinaturas.
A asociación recolle nun mapa que ten na súa web a localización dos puntos de recollida de sinaturas co obxectivo de facilitar o labor das persoas que queiran apoiar a petición de que a CRTVG aumente a oferta en galego destinada á infancia e á mocidade nas televisións públicas a través dunha canle “Xabarín”. Ademais do anterior tamén se pedirá que sexa unha programación atractiva, actual, educativa e de produción galega dirixida ao público infantil e xuvenil e dispoñíbel en todas as plataformas dixitais, así como nunha App actualizada que conten ademais con programas e xogos.
A proposición tamén insta ao Goberno da Xunta a adoptar as medidas e accións precisas para garantir a opción dobrada e lexendada ao galego nas plataformas dixitais e que TVE emita con opción dobrada ao galego todos os contidos da súa canle infantil e xuvenil e da súa App para o público infantil. O goberno galego deberá tamén adoptar as medidas necesarias que permitan a recepción mutua RTP – TVG en Galiza e Portugal segundo o contemplado na Carta Europea de Linguas Rexionais ou Minoritarias.
A Mesa Lemos anima a veciñas e veciños do sur de Lugo a asinar e tamén a que establecementos e xente a título individual se ofreza a recoller sinaturas. Para colaborar, os interesados e interesadas teñen que contactar a través do correo electrónico xabarintv@amesa.gal
En Monforte de Lemos recollen xa sinaturas nos establecementos seguintes: Imprenta Fénix e Tenda das Viandas. En Sarria pódese asinar no Estanco Gallego; en Chantada na Cafetería A Pisada dos teus zapatos e Chiquitines, tenda de bebé e en Taboada na Librería Arco Iris.
