Sara Inés Vega, alcaldesa do Concello de Castro Caldelas, atopou un cogomelo que chama a atención polo seu tamaño e así nolo quixo trasladar para dar conta da espectacularidade do mesmo.

Trátase, segundo nos di, dun fungo da familia dos “pleurotus“, especie comestible pero de pouco valor culinario. Ten un cheiro forte, pesa 4,5 quilogramos e ten 50 centímetros de diámetro.

Foi atopado por ela mesma na parroquia do Burgo, en Castro Caldelas, e estaba na beira da estrada xunto con outra ducia de cogomelos tamén grandes pero lonxe do tamaño deste exemplar.

Como curiosidade, a alcaldesa achéganos a foto doutro achádego que chamou moito a atención. Foi no ano 2015, cunha “lepiota” moi fermosa atopada no lugar de San Martiño. Aquí podedes ver as dimensións do cogomelo en cuestión.