O PSdeG-PSOE de Chantada alerta de cortes de subministro de auga que de xeito reiterado están a acontecer na rúa Carlos Otero Díaz . “Por sexta vez en menos de dous meses, os veciños levántase pola mañá no que parece unha macabra rutina sen fin ó non dispoñer de auga corrente. Á incomodidade e ós problemas que isto ocasiona únese a rabia e a impotencia de quen ten que buscar solucións alternativas día sí e día tamén para poder desenrolar os seus imprescindibles hábitos diarios,” sinalan.

Segundo os socialistas, os cortes constantes débense ao deterioro da rede de subministro, que se atopa anticuada, desgastada e “é incapaz de soportar a presión da auga nesta rúa.” Unha instalación de fibrocemento que non se renovou en décadas e que agora deixa de manifesto a necesidade dun cambio urxente que permita aos veciños desfrutar dun servizo que é esencial as 24 horas do día .

O grupo municipal socialista alertou deste problema en varias ocasións. A última delas nas reunións informativas que mantivo co grupo de goberno sobre a elaboración do proxecto orzamentario do 2021. Os socialistas pediron que se consignara unha partida para comezar o cambio desta rede xunto con outras rúas como a Avenida dos Pilos ou Doutor Fleming, o que estaba a acontecer en Carlos Otero Díaz.

No proxecto de Orzamento do Concello de Chantada para o vindeiro ano 2021, cuxo debate celebrarase previsiblemente o xoves día 3 de decembro, non aparece, segundo o PSOE de Chantada, ningunha partida para poñer fin a esta situación; polo que consideran que os cortes continuarán ata que o goberno popular de “decida investir nunha cuestión prioritaria coma esta.”