As experiencias turísticas son un agasallo cada vez máis habitual en calquera celebración do ano e, “se esa experiencia se desenvolve nun espazo que reúne todos os requisitos para compensar o ano tan fatídico que levamos, semella ser o agasallo ideal,” sinalan desde o Consorcio.

Ribeira Sacra foi un dos xeodestinos galegos con mellores cifras de ocupación durante a tempada de verán e apuntaba a acadar moi bos números en outono ata que chegaron os peches perimetrais. “A oferta de servizos e recursos parece estar feita á medida dos intereses máis actuais da demanda turística que prioriza os entornos rurais e naturais, ben posicionados e con baixa incidencia da COVID. E se a iso lle engadimos a súa condición de dobre candidatura ante a UNESCO para o 2021, a proposta faise aínda máis interesante,” insisten desde o Consorcio de Turismo da Ribeira Sacra.

Desde o Consorcio informan aos xestores das empresas turísticas de que prestan axuda na maquetación das tarxetas ou bonos-agasallo se non contan con eles. Tamén ofrecen asesoramento na composición dos mesmos e  diríxenos ás axencias de viaxe receptivo que habitualmente traballan na zona, “se queren vender os seus servizos combinados cos doutras empresas”