Laura Álvarez, titular do Bar Cruceiro e da Administración de Lotería que opera tamén neste local, está dando que falar esta fin de semana grazas a unha iniciativa novidosa en Monforte de Lemos.

“Estaba algo murcho o ambiente e pensei que poderiamos facer algo para animar o barrio en vésperas do sorteo da Lotería de Nadal”, comenta Laura ao tempo que nos explica en que consiste o xogo que propón a veciños e veciñas de Monforte para conseguir algún décimo dun número que venden no Bar Cruceiro.

De sábado 19 a luns 21, días previos ao Sorteo de Nadal, o monfortino barrio de San Antonio será o escenario da busca de 5 décimos de lotería que estarán agochados en calquera lugar que poidamos imaxinar dentro da contorna máis próxima á Praza Campo de San Antonio. Os vales estarán dentro dunha funda de plástico e unha vez atopados serán canxeados polo décimo real no Bar Cruceiro.

Cinco décimos que estarán no seu agocho estes tres días esperando ser descubertos e “a pista do día” dará a benvida no Bar aos ousados/as participantes para axudar na súa busca. As condicións son mínimas: só se fará entrega dun décimo por persoa, a entrega deles sempre a persoas adultas e os afortunados/as terán que facerse unha foto no momento da entrega.

Este sábado empezou esta curiosa ‘busca do tesouro’ e a primeira pista, anotada nun cartel do establecemento, rezaba así: “El remedio de la tía Mariquita, que con aceite todo lo quita”. Falamos con Laura, a artífice de todo isto, e coméntanos que a última hora da tarde xa apareceron dous. O primeiro afortunado atopou o boleto na oliveira que hai na entrada do aparcamento da Casa do Concello monfortina, e o segundo non moito máis tarde e estaba entre unhas polas das árbores da Praza Santo Antón.

Quedan tres, e dous días. Sorte a todas e todos!