Laura Álvarez, responsable da administración de lotería que hai no establecemento, cóntanos que quedou moi satisfeita co resultado da súa iniciativa, da que demos conta días atrás.
A idea de organizar un xogo coa escusa de agasallar con décimos de lotería a monfortinas e monfortinos tivo unha gran acollida, e tanto foi así que os cinco décimos que escondera para ser buscados de sábado a luns pasaron a ser sete, dous máis, e o domingo pola noite xa apareceran todos. Algúns apareceron incluso sen tempo a facerse pública a pista correspondente.
“A iniciativa chegou a moita xente e esta fin de semana houbo moito ambiente na praza”, comenta Laura. “E gustoulle moito aos nenos/as co cal xa pensamos repetir a experiencia para o ano e facer algo concreto pensando neles tamén”, engade.
Agora, se xa toca o número protagonista do xogo sería a bomba, unha “sorte dobre” para os/as afortunados/as que xa tiveron un primeiro premio atopando algún dos décimos escondidos. Esta loteira monfortina soña con esta posibilidade e cruza os dedos…
