Os Reis Magos non faltarán á súa cita anual no Concello de Taboada, pero este ano farano de xeito especial por mor das circunstancias da pandemia. Chegarán en globo, sempre que as condicións meteorolóxicas o permitan, e tras sobrevoar dende as 16:00 h. a vila tomarán terra no Campo de fútbol “A Medela” ás 17:00 h.
As portas do recinto deportivo abrirán ás 16:45 h. e a entrada farase por unidades familiares con uso de máscara e distancia de seguridade. Os Reis non traerán aos seus axudantes, os Paxes, co cal prégase respecto total pola distancia e polas indicacións dos acomodadores que ordearán o achegamento ás Súas Maxestades cando lle corresponda a cada unidade familiar.
Despois da breve recepción e entrega de agasallos, os nenos e nenas que o desexen poden participar da actividade de subida en globo -globo cautivo e se as condicións climatolóxicas o permiten- sempre acompañados de adultos e só posible para cativos/as que teñan máis de sete anos.
