Este domingo ás seis da tarde cada neno do concello de Folgoso do Courel, na súa aldea, fixo tanto ruido como puido para que as súas reivindicacións sexan escoitadas. Este luns non foron tampouco ao colexio, despois de que o venres pasado non acudira ningún alumno ao Cpi Poeta Uxío Novoneyra e, pola tarde, outra xa tiveran unha cacerolada.
O vindeiro mércores 13 ás 12 a Anpa do centro escolar convocou unha concentración no edificio administrativo da Xunta en Lugo.
E o concello de Folgoso do Courel informa de que a Valedora do Pobo vén de comunicar que estudarán o escrito presentado polo concello con repecto á situación do transporte escolar no concello. Tras dito estudo informarán se procede ou non admitir a queixa a trámite.
Nas súas alegacións, o Concello de Folgoso do Courel expón o prexuízo que supón a supresión de liñas que realizaban taxistas locais e que agora levarán a cabo empresas con microbuses. Respecto diso, censura que coa nova proposta suprímense “varias paradas”, mentres que o ancho das estradas desta zona da montaña de Lugo non está habilitado nalgúns tramos para microbuses. Así o servizo “empeora” para os alumnos, ao que se une o dano que se fai á viabilidade económica do negocio destes taxistas que levan máis de 30 anos desempeñando estes roteiros escolares. Por todo iso, o Concello de Folgoso do Courel reclama a anulación ou modificación do prego referente a estas liñas do municipio, de forma que se manteñan as seis liñas actuais para non prexudicar ao alumnado e prímese a contratación de empresas e autónomos locais.
