Os deputados populares no Congreso pola provincia de Lugo, Joaquín García Díez e Jaime De Olano, advirten de que “as variantes dos Peares e de Oural son as máis importantes en relación á modernización e electrificación da liña do ferrocarril entre Lugo e Ourense porque permitirían a redución de tempos entre Lugo e Ourense e a posterior conexión da nosa provincia coa alta velocidade”.
Segundo os populares así se desprende da resposta do Goberno ás preguntas formuladas por García Díez fai 12 meses e que “non pode ser máis decepcionante” porque “as obras destas variantes aínda están na fase de estudo informativo”. Aseguran que o Executivo central recoñece que non avanzou absolutamente nada nos últimos anos, é dicir, dende que gobernaba o Partido Popular que deixara xa os proxectos en marcha coas correspondentes dotacións orzamentarias e un cronograma que permitía un horizonte razoable”.
Esta resposta vén a confirmar as críticas dos populares nas que advertían de que a nosa provincia seguiría moitos anos lonxe da redución de tempos entre Lugo e Ourense e da conexión coa alta velocidade “da que non dispoñemos en Lugo a día de hoxe.
Nulas ou ínfimas dotacións para a A-56
Os deputados lucenses do PP seguen moi de preto a conexión da provincia de Lugo coa de Ourense. De feito, fai poucos días demandaban xunto aos deputados ourensáns que o Goberno central dedicase á autovía A-56 as cantidades consignadas nos Presupostos Xerais do Estado do 2018 elaborados polo Goberno de Mariano Rajoy.
Trala posta en servizo do tramo entre A Barrela (Carballedo) e San Martiño (Vilamarín), o futuro desta autovía é “preocupante” tendo en conta a situación na que se atopan o resto dos tramos debido ás nulas ou ínfimas dotacións que o Goberno socialista incluíu na Lei de Orzamentos Xerais do Estado para 2021 á que os deputados do PP presentaran emendas no seu trámite parlamentario para elevar as dotacións para os distintos tramos da vía que foron rexeitadas.
