O escrito presentado está asinado tanto pola ANPA como polos taxistas que se atopan realizando o servizo de transporte dos escolares, ademais de representantes de ‘Courel Vivo’ e do BNG.
Os asinantes defenden que o sistema existente ata agora, prestado por diversos taxistas do municipio, “garante a cohesión socioeconómica xa que ademais de prestar o servizo de accesibilidade a escolares, contribúe a fomentar o emprego na zona” e “reduce o tempo de traslado”.
“A cuestión de fondo é a necesidade de servizos nas zonas de montaña que debe ser garantida polas diversas administracións públicas a través de políticas inclusivas de cohesión territorial”, trasladan.
VULNERACIÓN DA NORMATIVA
Aseguran que o modelo proposto pola Xunta para as bases de licitación do servizo para a súa zona supón unha “vulneración de normativa” comunitaria.
A ANPA sinala que o modelo infrinxe unha resolución do Parlamento Europeo, do 3 de outubro de 2018, sobre a resposta ás necesidades específicas das zonas rurais, montañosas e periféricas da UE, ademais do regulamento polo que se establecen normas comúns para os transportes internacionais de viaxeiros efectuados con autocares e autobuses.
En concreto, refírense aos artigos sobre transportes regulares especializados, incluíndo entre o domicilio e o centro de ensino de escolares; e o que posibilita a denegación da solicitude de autorización de transporte se se comproba que o servizo obxecto da solicitude podería comprometer directamente a existencia de servizos regulares que xa foron autorizados.
“Consideramos que, segundo están as bases de licitación do transporte escolar antes mencionadas, á devandita convocatoria non se lles permite concorrer aos actuais adxudicatarios do transporte escolar, todos eles taxistas autónomos locais con vehículos de 9 prazas adecuados ás estradas e rutas da zona, o que comprometería directamente a viabilidade económica dos seus negocios, vulnerando así o citado Regulamento Europeo e o obxectivo da cohesión social e económica”.
Lembran que a contratación se beneficia de fondos FEDER para o seu cofinanciamento e apelan ao articulado deste regulamento para denunciar que “tería como consecuencia a perda de emprego na zona”, así como un “empeoramento do servizo para os usuarios”. Nestes días a Anpa do Cpi de Navia de Suarna iniciou unha recollida de firmas coas mesmas reivindicacións que o colexio do Courel.
PROCESO SUSPENDIDO
A Consellería de Educación, pola súa banda, anunciara a comezos de xaneiro a suspensión do prazo de presentación de ofertas dos novos contratos do transporte escolar, co fin de verificar erros detectados polos interesados no proceso e estudar correccións e alternativas ao modelo.
