Parte do alumnado do CEIP Xoán de Requeixo leva dende o pasado curso 2019- 2020 cun problema no horario do transporte escolar. O que piden as familias afectadas é adaptar o horario do transporte escolar ao lectivo e de comedor, e evitar agardar polo autobús 45 minutos.
A pasada semana, a Deputada do BNG por Lugo Carme Aira rexistrou unha iniciativa parlamentar coa intención “de solucionar este desaxuste horario” xa que “ en política é moi importante resolver os problemas da vida cotiá” e é incrible que se dean situacións tan anómalas e cunha solución tan sinxela.
O que estaba a acontecer nestas liñas de transporte escolar é unha mostra máis da “falta de planificación e do desinterese do goberno galego polos problemas da vida real, seguindo a liña de recortes de recursos públicos, nomeadamente no ámbito rural”, abonda a deputada nacionalista autora da iniciativa que tivo como resposta a pronta corrección de dúas das rutas con deficiencias no horario do transporte escolar do Xoán de Requeixo, quen ademais celebra a “medida adoptada pola Xunta” pero lembra que “aínda existen outras liñas que manteñen o horario de autobús ás 16:00h” e o goberno galego ten que asegurar ao todo o alumnado un servizo axeitado de autobús, que ademais sexa público, gratuíto e de calidade e que garanta a igualdade de oportunidades ‘vivan onde vivan, e sexan moitos ou poucos‘ engade a deputada.
